عدد الرسائل : 144 العمر : 36 تاريخ التسجيل : 20/01/2009
موضوع: تنتن وتنتون.... الأحد فبراير 15, 2009 12:49 am
طبعا هتقولوا ايه العنوان ده ؟!!! ، عامل حسابي ، فاكرين المثل اللي بيقول : " اتلم تنتن على تنتون ، واحد .............. والتاني ..........." ، اكيد افتكرتوه ، اهو ده اللي انا قابلتهم في "اولى ثانوي" ، يااااه كانت ايام سودا بعيد عنكم ، المهم كان في اتنين معايا في الفصل مأنتمين مع بعض أو تقدروا تقولوا ............. مع بعض (زي المثل) أنا هأحكي بس اللي حصل في أول يوم دراسي ، وتخيلوا انتوا الباقي عشان أنا مش بحب أفتكر الأيام دي اليوم الدراسي الأول (((الحصة الأولى))) : عــــــربـــــي بعد ما سلم علينا الأستاذ واتعرف علينا ، قال لنا اقروا أبيات الشعر في صفحة ( والله ما فاكر ) المهم ، بعد خمس دقايق : الأستاذ : مين يقدر يقولي صاحب أبيات الشعر دي ؟ طالب : عنتر بن شداد يا أستاذ تنتن : مش عنتر ده اللي مات في حادثة موتوسيكل تنتون : آه ، وبعدين عبلة بعديه اتجوزت أخوه شبشوب تنتن : شبشوب ايه يا غبي ، اسمه شيبوب تنتون : يا عم غلطنا في مين يعني ، ده حتى اتمسك في قضية مخدرات ---( ناصحين فعلا )--- ((( الحصة التانية ))) : دراســـــــــــــات بعد برضه ما سلم علينا الأستاذ : بصوا يا ولاد ، الدراسات دي مادة مشوقة هتحبوها غير الدراسات بتاعة الاعدادي ، بس هي عاملة زي المسلسل ، لو فاتت منك حلقة ما تفهمش بقية الحلقات تنتن : ما ممكن يتفرج ع الإعادة يا أستاذ الأستاذ : هنبتدي بالجغرافيا : وملخص الدرس ، إن أمريكا يا أولاد دولة زراعية وصناعية كبرى ، بتصدر لمصر القطن والقمح والأرز والذرة و............ تنتون : امال احنا يا أستاذ بنصدر ايه ؟ تنتن : بنصدر الطرشة الأستاذ : نيجي للتاريخ تنتن : ممكن أسأل سؤال يا أستاذ ؟ الأستاذ : قول تنتن : هو في حريق الأقصى ايه اللي حصل ؟ تنتون : الجامع اتلسع ---( يا نهار خفة دم )--- (((الحصة التالتة))) : رياضيـــــــــــــــات برضه سلم علينا الأستاذ : أوجد قيمة المقدار نها2,س-13س-3 تنتن : ده يتوقف ع نها عايزاه كام ؟ ---(آه لو كان معانا بنات ، كان زمانه مات مسموم )--- (((الحصة الرابعة))) : كيميـــــــــــــــاء سلم علينا الأستاذ : دلوقتي حد يقدر يقولي ما هي صيغة البنزين ؟ تنتن : ما أقدرش ، احسن صاحب البنزينة يزعل مني تنتون : ده برضه يتوقف إذا كان 90 ولا 80 ---( عايزين يتولع فيهم )--- ((( الفسحة ))) : استراحة من الخفافة ((( الحصة الخامسة ))) : أحيــــــــــــــاء الأستاذ : حد يقولي ما هي دورة حياة النحلة ؟ تنتن : ما أقدرش أصل عندي حساسية منه ، ممكن أقول دورة حياة البرغوت ، في منه في قفا ......... -> (تنتون) ---( سو لوكال )--- ((( الحصة السادسة ))) : ألعاب قعدوا يضايقوا في الأستاذ الأستاذ ( لتنتون ) : انزل اعمل ضغط تنتون : ما عنديش جهاز ضغط يا أستاذ ، ممكن تنتون يعمل أصل ابن عمه سباك ---( يا ريته كان غير الجلدة بتاعتهم )--- طيب بذمتكم لو معاكم ناس كده ، كنتوا تعملوا ايه ؟
